حـــــيــــــــاة شــــــــــاب

اعتصامات,احتجاجات,رفض,حبس ضباط,تنديد بتزوير انتخابات, الناس بتتكلم و مبقاش يهمها

فى الامثال اليابانيه قالوا البركان يبدء بحصوه و هو من انسب الامثله التى ارى انها تصف حاله الشارع المصرى الأن

فهاهى الحصوه قد ظهرت فهل بالفعل سوف يثور البركان و ينزل بحممه ليغسل الفساد و يحرر القيم

ام انه سرعان مايخمل ويصبح من البراكين الخامله التى قلما تثور

وصلنا لحاله من عدم الأكتراث فى ظل نظام وحزب غاشم يمثله جعل العيش و الموت سوا بل اصبح العيش مهانه و انتكاسه للذات البشريه ولكن هيهات لاحياه لمن تنادى

لقمه العيش للكبار , الدماغ و الاصتباحه و المزاج للشباب ولو الأطفال هيتخاف منهم فى يوم من الايام اكيد يكونلهم حاجه يجروا وراها

نقطه التحول قريبه و اقرب مما يظن البعض ماهى لااعلم ولكنها نقطه تحول سوف تغيير مجرى الحياه فربما

اصبحنا اسوء من الان و سوف نظل هكذا اعواما او ربما اصبحنا شعبا يقدر الحريات و يصبو للعيش الحميد

و الكريم فى ظل حكومه تقدر الحقوق

تسائلت كثيرا ماهى السياسه هل هى المنافقه و الحرص على المصالح الشخصيه و التنكر بالطيبه و انتظار اللحظه الحاسمه للمشاركه, ام الثور على كل ماهو مذل و التنديد به و تعريض النفس للمخاطر

شخصيا ارى ان السكوت ليس علامه الرضا كما يقال فى الافلام فى لحظات طلب الزواج ولكنها علامه الخوف و الجبن ولاشئ غيره ولا اظن ان اى انسان حر يقبل ان ينعت بالجبن حتى لو لم يقلها له احد فيكفى ان يحس بها فى قراره نفسه

تساألت كثيرا لماذا اكتب ؟ هل السبب هو حب الكتابه التى لا اجيدها ام محاوله لارضاء الذات و التعبيير بأى وسيله حتى لو كانت فى مدونه لايقراءها احد غالبا...لااعرف ولكن الذى اتخيله دائما هو انت الذى تجلس قابعا فى مكانك تنظر للمدونات و تقراءها بعنايه مكونا فكره او تحليل لشخصيه صاحب هذه المدونه

اكتب اليك ولا اعرف من انت فربما ساعدتك فى معرفه شئ او اتخاذ قرار عن طريق الصدفه يجعلك تتذكر تلك المدونه التى ساعدتك يوما فى حياتك .

اكتب و احاول ان اكون حياديا و لكن للأسف اصبحت الحياديه تمردا فى زمن اصبح التفكير فيه نعمه و اصبح الجهر به نقمه .

اكتب الى الاّخر الذى ينظر الينا بعين الاستخفاف فأجعله يحسب لنا الحسبه.

لااعلم ماذا تخبئ لنا الايام فربما اصبحت واحدا من رواد كتابه المقالات و الكتب او ربما اصبحت مجرد قارئ لا أكثر وما اقلهم فى هذا العصر الذى اصبح ينظر الى القراء بعين الاستغراب حتى يظن المرء احيانا ان المثقف هو الجاهل و العكس صحيح

اكتب الى يوم يأتى قريبا انشاءالله اكون فيه انسانا امام الله اولا و أمام نفسى و الناس ثانيا فأتذكر هذا اليوم وهذه المدونه

تخيل انه اتعرض عليك 3مليون جنيه رشوة!!..وأنت مرتبك اللي بتاخده من الحكومه يادوب مايكملش 300 جنيه!!.لأوأيه..ده كل اللي مطلوب منك حته امضاء على قرار ازاله لبيت قديم فى ميدان الجيزه!!

تعرف ايه اللي حصل؟..اللي حصل ياسيدى أن المهندسه منال سيد حسن رفضت تقبل الرشوه.

حد يعرف سهير الشرقاوى؟ . سهير بقى بتشتغل موظفه فى وزاره الصحه.وقامت باكشف عن اكتر من قضيه فساد , وكان من أشهرها قضيه أكياس الدم الفاسده الى كانت بتوردها شركه هايديلينا للمستشفيات.

و غيرهم وغيرهم من النماذج المصريه اللي بتحاول بكل طاقتها انها تمنع الفساد فى بلدنا و تحاربه
شارك معنا و قوم بالتصويت لواحد من الناس دى على الموقع الالكترونى www.nadafa.org واللى هتلاقى عليه معلومات اكتر تقدر تعرفها عن كل واحد فيهم.

كمان تقدر تقوم بالتصويت عن طريق ارسال رساله قصيره بأسمك و ترشيحك الى تليفون رقم 012862 65 47

او ابعت على العنوان ده : اهرو 14 ش الأحرار , الدقى 11331 , القاهره

الدعوه مفتوحة لكل مواطن مصرى و مواطنه مصريه لحضور اعلان نتائج التصويت,واللي هتكون يوم الأحد 9 ديسمبر2007 الساعه 9 مساء,بقاعه النهر-ساقيه عبد المنعم الصاوى بالزمالك

ويشرفنا حضوركم

هى من المرات القليله التى استمع فيها الى فيلم صوتى و لكنها الاولى

التى ارى فيها الفيلم و اتخيله كاملا بدون ان ارى مشهدا واحدا مرئيا

مجهود عظيم ينم عن مثابره و اجتهاد بناء لكم منى كل التقدير لاسره العمل

و للاستاذ خالد المهدى و بالتوفيق انشاءالله دائما

حمل الفيلم

فعلا مش هتفرق لانه تم منع عرض اى تعليق على اى موضوع من موضوعات مصراوى سواء السياسيه او الرياضيه او الاقتصاديه و ده كان بعد موضوع العاصمه الجديده و تأجيل تنفيذه و ده طبعا لان الفقراء و حالتهم من اولويات الدوله و تصريحات المسئولين و تعليقات المواطنين اما صحيح بلد ديمقراطى

مصطلحات و مفاهيم سياسيه معظم الشباب معندوش فكره عنها علشان كده انا فكرت انى اذكر بعضها فى خطوة نحو التثقيف السياسى
و محو الجهل السياسى الواضح فى جمهور الشباب فجمعت عدد من المقالات و اخترت الثوابت منها و لو حد ليه تعقيب او تعليق على مفهوم او تعريف ياريت يقوله علشان الكل يستفيد منه و نبتدى بــ

أرستقراطيه
تعني باللغة اليونانية سُلطة خواص الناس، وسياسياً تعني طبقة اجتماعية ذات منـزلة عليا تتميز بكونها موضع اعتبار المجتمع ، وتتكون من الأعيان الذين وصلوا إلى مراتبهم ودورهم في المجتمع عن طريق الوراثة ،واستقرت هذه المراتب على أدوار الطبقات الاجتماعية الأخرى، وكانت طبقة الارستقراطية تتمثل في الأشراف الذين كانوا ضد الملكية في القرون الوسطى ،وعندما ثبتت سلطة الملوك بإقامة الدولة الحديثة تقلصت صلاحية هذه الطبقة السياسية واحتفظت بالامتيازات المنفعية، وتتعارض الارستقراطية مع الديمقراطية.

أنثروبولوجيا
تعني باللغة اليونانية علم الإنسان ، وتدرس الأنثروبولوجيا نشأة الإنسان وتطوره وتميزه عن المجموعات الحيوانية ،كما أنها تقسم الجماعات الإنسانية إلى سلالات وفق أسس بيولوجية، وتدرس ثقافته ونشاطه.

أيديولوجية
هي ناتج عملية تكوين نسق فكري عام يفسر الطبيعة والمجتمع والفرد، ويحدد موقف فكري معين يربط الأفكار في مختلف الميادين الفكرية والسياسية والأخلاقية والفلسفية.

أوتوقراطية
مصطلح يطلق على الحكومة التي يرأسها شخص واحد، أو جماعة، أو حزب، لا يتقيد بدستور أو قانون، ويتمثل هذا الحكم في الاستبداد في إطلاق سلطات الفرد أو الحزب، وتوجد الأوتوقراطية في الأحزاب الفاشية أو الشبيهة بها، وتعني الكلمة باللاتينية الحكم الإلهي، أي أن وصول الشخص للحكم تم بموافقة إلهية، والاوتوقراطي هو الذي يحكم حكمًا مطلقًا ويقرر السياسة دون أية مساهمة من الجماعة، وتختلف الاوتوقراطية عن الديكتاتورية من حيث أن السلطة في الأوتوقراطية تخضع لولاء الرعية، بينما في الدكتاتورية فإن المحكومين يخضعون للسلطة بدافع الخوف وحده.

براغماتية) (ذرائعية))
براغماتية اسم مشتق من اللفظ اليوناني " براغما " ومعناه العمل، وهي مذهب فلسفي – سياسي يعتبر نجاح العمل المعيار الوحيد للحقيقة؛ فالسياسي البراغماتي يدعّي دائماً بأنه يتصرف ويعمل من خلال النظر إلى النتائج العملية المثمرة التي قد يؤدي إليها قراره، وهو لا يتخذ قراره بوحي من فكرة مسبقة أو أيديولوجية سياسية محددة ، وإنما من خلال النتيجة المتوقعة لعمل . والبراغماتيون لا يعترفون بوجود أنظمة ديمقراطية مثالية إلا أنهم في الواقع ينادون بأيديولوجية مثالية مستترة قائمة على الحرية المطلقة ، ومعاداة كل النظريات الشمولية وأولها الماركسية.

بروسترايكا
هي عملية إعادة البناء في الاتحاد السوفيتي التي تولاها ميخائيل جورباتشوف وتشمل جميع النواحي في الاتحاد السوفيتي ، وقد سخر الحزب الشيوعي الحاكم لتحقيقها ، وهي تفكير وسياسة جديدة للاتحاد السوفيتي ونظرته للعالم ، وقد أدت تلك السياسة إلى اتخاذ مواقف غير متشددة تجاه بعض القضايا الدولية ، كما أنها اتسمت بالليونة والتخلي عن السياسات المتشددة للحزب الشيوعي السوفيتي .

بروليتاريا
مصطلح سياسي يُطلق على طبقة العمال الأجراء الذين يشتغلون في الإنتاج الصناعي ومصدر دخلهم هو بيع ما يملكون من قوة العمل، وبهذا فهم يبيعون أنفسهم كأي سلعة تجارية.

وهذه الطبقة تعاني من الفقر نتيجة الاستغلال الرأسمالي لها، ولأنها هي التي تتأثر من غيرها بحالات الكساد والأزمات الدورية، وتتحمل هذه الطبقة جميع أعباء المجتمع دون التمتع بمميزات متكافئة لجهودها. وحسب المفهوم الماركسي فإن هذه الطبقة تجد نفسها مضطرة لتوحيد مواقفها ليصبح لها دور أكبر في المجتمع.

بورجوازية
تعبير فرنسي الأصل كان يُطلق في المدن الكبيرة في العصور الوسطى على طبقة التجار وأصحاب الأعمال الذين كانوا يشغلون مركزاً وسطاً بين طبقة النبلاء من جهة والعمال من جهة أخرى، ومع انهيار المجتمع الإقطاعي قامت البورجوازية باستلام زمام الأمور الاقتصادية والسياسية واستفادت من نشوء العصر الصناعي ؛ حتى أصبحت تملك الثروات الزراعية والصناعية والعقارية، مما أدى إلى قيام الثورات الشعبية ضدها لاستلام السلطة عن طريق مصادرة الثروة الاقتصادية والسلطة السياسية.

والبورجوازية عند الاشتراكيين والشيوعيين تعني الطبقة الرأسمالية المستغلة في الحكومات الديمقراطية الغربية التي تملك وسائل الإنتاج

فى ضوء المراجعات الفقهيه للجماعات الاسلاميه و المتمثله فى مراجعه الدكتور فضل او سيد امام امير تنظيم جماعه الجهاد سابقا اصدر الشيخ امام و ثيقه دعا فيها الى الأسس و المبادى من القرأن الكريم و السنه و نهى عن سفك الدماء و الافتاء بدون وجه علم و عدم معارضه الحاكم المسلم حيث و ضح ان مفهوم الغايه تبرر الوسيله
هو مفهوم علمانى و ليس من الاسلام فى شئ و صرح سيد امام ان بعض مقالاته و كتبه قد فهمت فهما خاطئ ناتج عن عدم العلم الكامل بالاسلام و السنه و ناشد المعتدلون من اعضاء الجماعات الاسلاميه فى الخارج اعضاء الجهاد و الجماعات
الاخرى بالنظر فى مراجعات سيد امام بعين الجد و الجدير بالذكر ان جريده المصرى اليوم تقوم حاليا بنشر تلك الوثيقه و على ما اعتقد انها الوحيده حتى الان صاحبه حقوق النشر

ها هو الرد قد جاء كما توقعت ولكن مالم اتوقعه ان يأتى فى احدى الصحف العريقه فلا اعلم اذا كان ردا على ما جاء فى مدونتى "بنستسهل ولا بنتعسف" بتاريخ 8 نوفمبر 2007 ام بمحض الصدفه و لكن هذا لا يهم فقد عرفت وجهت نظر المحررين لاحدى الصحف العريقه الا و هى الأخبار اذ اتى بصوره مماثله لما التقطه و كتب موضوعا بعنوان "اللى ميقدرش يمشى ..... ينط" بتاريخ 10 نوفمبر 2007 اى بعد مدونتى بيومين والقى اللوم فى تلك المقاله على السيده العجوز مبررا ما فعلته على انها شقاوه ستات و نسى من اجبرها على فعل ذلك و كما يقال فى الامثال " ايه رماك على المر... اللى امر منه" لا اعرف لماذا دائما يصرون على القاء اللوم على المواطنين و كأن المسؤلين لا يخطئون على اى حال انا كنت متوقع شئ من هذا القبيل لانه ده طبعهم مش هيشتروه و اكرر النداء اذا كنت تعرف حد فى رئاسه الحى و يقدر يخدمك كلمه و ساعد الناس الكبيره دى و افتح فتحه قريبه يقدروا يعدوا منها بدل ماهما بيجازفوا بانه تتكسر رقابتهم على انهم يمشوا مشوار الى اخر بلاد المسلمين

افرحوا ياشباب مفيش تعذيب بعد كده مفيش ظباط هيحطوا العصيان فى حتت وحشه النهارده اتحكم على الظابط اسلام نبيه و رضا فتحي فى قضيه التعذيب و انتهاك حرمه المواطن بالسجن ثلاث سنوات مع الشغل و النفاذ بس برضه مع صدور الحكم تم منع الموبيلات الى بكاميرات من دخول الاقسام و مراكز الشرطه يعنى من الاخر هيعذبوا المره دى بس من غير محد يعرف ولا يمسك عليهم حاجه مبروك يا شباب انتهى عصر التعذيب العلنى و ابتدى عصر التعذيب المستتر

شبابنا الحلوه.. شبابنا الجامد...... شبابنا التافه جدا

عملت ايه النهارده ..... أصطبحت ولا لسه؟؟؟

قعدت على القهوه ولا لسه؟؟؟

كلمت صاحبتك ولا لسه؟؟؟

لعنت فى بلدك و انتا متعرفش ايه فى بلدك ولا لسه؟؟؟

حسيت ان اهلك بيطلع عنيهم علشانك ولا لسه؟؟؟

حسيت انك لازم تكون راجل ولا لسه؟؟؟

جبت الوظيفه و اشتغلت ولا لسه؟؟؟

ناوى تتحرك ولا لسه؟؟؟

ناوى تفكر ولا لسه؟؟؟

سمعت حد بيقولك الكلام ده ولا لسه؟؟؟

فى سلسله من مدونات النقد (من وجهه نظري انا طبعا)
قولت احسن واحد ابتدى بيه هوا انا علشان انا شايف اصلا ان الغرض من النقد ده ان كل واحد يعرف عيوبه مش المهاجمه زي ماناس كتير شايفين ده او فاكرين كده

وطبعا انا عارف ان مش صح انى انقد نفسى لانه احسن الناس و اقدرها مبتقدرش تشوف عيوبها كلها و النقد بيجي من الغير بس انا هاكتب الى انا شايفه فى نفسى و انتوا لو شايفين حاجه زياده وحشه ياريت تعرفونى ده لو انتوا فعلا مهتمين ب
يا
المهم بعد المقدمات و الكلام المزين ندخل فى لب الموضوع علشان محدش يتوه
انا ببساطه شايف انى الاسوء فى معظم المواقف و الصفات فمثلا انا شايف انى مشتت بطريقه غريبه يعنى نفسى اعمل حاجات كتير اوي فى نفس الوقت و ده مش صح دايما مش بركز في حاجه واحده و اكون كويس فيها لاء لازم اكون عارف معظم الحاجات و ده فى الشغل الصح مش كويس خالص تانى حاجه

انا شايف انى مودى اوى مش بمعنى انى اخنؤ على حد لما اكون مدايق بس ممكن اكون كويس مع انسان اوي علشان انا فى المود ده و برجع اكون عادي لما ارجع لى مودى الطبيعى الى هو الهدوء انا شايف كده يمكن ناس تختلف معايا فى ده بس كل واحد حر فى رأيه
, احيانا بكون انانى مش حابب حد يكون معاه الحاجه دى الا انا و بس
, ممكن اكون استغلالى فى مواقف كتير
, دايما شايف انى انا الصح و بقتنع بصعوبه و مش اى حد يقنيعنى لازم اكون انا مقتنع بتفكيره علشان يوصلنى لفكره تانيه , عصبى بكون غبى لما بتنرفز ممكن ازعل ناس كتير ملهاش اى ذنب فى اى حاجه
, ممكن اجى على ناس كتيره علشان اوصل لحاجه معينه و انا عارف انه مش هيزعل بس انا لو مكانه هزعل و احيانا بتحصل الحركات دي من غير اصدى,
بحب البنات اوى فى ناس كتير ممكن تقولى اشطه يامان ده عذوه بس معايا انا ممكن اعجب بناس كتير فى وقت قصير و دى بذات عملالى مشكله فى حياتى بجد مبقتش عارف امتى ده بيكون حب بجد ولا لسه فى مرحله الاعجاب و مش عايز حد يطلعلى لابس عبايت الحكمه و يقولى الحب الحقيقى بيبان علشان انت ممكن تعجب بواحده و هى كمان تبدلك نفس الاعجاب فتطلعوا كل الى عندكوا و تكتشفوا بعد فتره انه بس اعجاب و فى حاجات بينكوا كتير مختلفه و انه صعب حياتكوا مع بعض تكمل ,

نجى لى اوسخ حاجه انا شايفه فى نفسى و هى حب الامتلاك بحب معظم الحاجات تكون عندى يعنى مش كل حاجه طبعا بس محدش يكره ان الحاجات تكون عنده و ده طبعا منطبق على البنات بكون هموت على البنت انها تبوصيلى و لما تقولى بحبك مش بيكون ليها طعم بمعنى انى ممكن ازهق منها بعد فتره ممكن ده بيكون بيحصل لانه بيكون اعجاب او ايه الله اعلم ,

القناعه عندى وقتيه بمعنى انه على اد امكانياتى فى الوقت الحالى بحاول اقنع نفسى بس طبعا مع اى فرصه انى اتغير الكلام ده كله بيتغير و مبكنش مقتنع بى الى معايا عرفتو اد ايه انا مخنوء من نفسى و من تصرفاتى على ما اعتقد انى الاسوء بين الناس

النهارده هاحكيلكوا على يوم من ايامى الممله و الروتين اليومى الى قرب يجيبلى شلل على كل حال احيانا الروتين ده بيكون محبب للنفس زى روتين جرعات الحنان بتاع قبل النوم والى انا مدمن عليه شخصيا

المهم النهارده صحيت من النوم كالعاده علي صوت الموبايل طبعا نصى التانى دايما بتصحينى علشان اروح الشغل بدري و متأخرش بس للأسف لازم اوصل متأخر الا احيانا بوصل فى المعاد المهم صحيت و دخلت الحمام فضلت واقف قدام المرايا زي كل يوم مبحلق فى واحد غريب الشكل مش عارف ده ممكن لما يتجوز و مراته تشوفه كده الصبح تقول ايه و طبعا الشيطان لازم يلعب لعبتو الدنيئه الى ممكن اعملها احسن منه من كتر ماتعودت عليها الا و هى اللعب على اوتار الكسل والراحه اللذيذه و يقولى ياواد ماتروحش و نام النهارده علشان تصحى اليوم الى بعديه فايق و مصحصح و اكيد الصراع ما بيكونش من طرف واحدلازم الطرف التانى يطلع و يتكلم متمثل طبعا فى الضمير الى بدوره بيفكرنى بان ممكن يتخصم من المرتب و كلام كده علشان انا بس كسلان المهم عقدت النيه انى هانزل الشغل اتوضيت وصليت الصبح علشان كنت نايم بدرى و ملحقتش الفجر ولبست هدومى و نزلت

,مشوار كل يوم لاحمد عرابي و افضل مستنى السي تي ايه او المكيف زي ماقولتيلكم قبل كده و فين و فين على مايجى المهم ركبت و ابتديت شويه اتفرج على الناس الى فى الشارع و اد ايه هما متبهدلين من العشوائيه و شويه اسقط كده و اروح فى النوم و مصحاش الى على خبطت دماغى فى زجاج الشباك بسبب مطب هوا مثلان و ما اكترهم فى شوارعنا الاوروبيه وواحده مش قدره تمسك نفسها من الضحك على منظري المهم وصلت ميدان الحريه فى المعادي علشان هو اقرب حاجه لشغلى و اتمشيت كده
و انا في طريقى للشغل كان في واحده وارايا بتقولى لو سمحت لو سمحت وقفت و قولتيلها ايوه لقيتها بتقولي انتا كنت راكب معايا من المهندسين صح قولتيلها ايوه صح ,اوعى تكون كمان رايح اكاديميه السادات الى انا رايحاها و مش عارفا طريقها منين ,ضحكت كده و قولتيلها لاء ياستى انا مش رايح هناك انا اتخرجت خلاص بس ممكن اوريكي الطريق ازاي ,أوه ميرسى انت جينتل اوي قولتيلى اسمك ايه!! ,قولتيلها حضرتك هاتمشى علطول و هتلاقى الاكاديميه علطول باى ,وسيبتها و مشيت

و طلت الشغل لقيت زميلى المهم قعدت على مكتبى و ابتديت اشتغل اكتشفت انى مش بعمل اي حاجه لانه لسه مجليش جدول المهام الى مفروض هشتغل بناء عليه و طبعا لازم شخصيه زي عبد الرحمن تطلع بكلمه زي و ايه يعنى يا عم هو حد طايل المهم فضلت بقيت اليوم كده ما بين المناقشه مع نادر و احمد المهم لقيت واحد زميلى بيحضر حاجته علشان يروح ساعتها كان في حوار بينى و بين نفسى انا كده كده قاعد مبعملش حاجه اقعد و اخد فلوس على القعده دي ولا اروح بينى و بينكو انا قلت انا اروح افطر فى بيتى يوم بدل ما كل يوم بفطر في الشركه

و نزلت معاه و فضلنا نتكلم طول الطريق لحد ما وصلنى عبد المنعم رياض و من هناك خدت تاكسى لحد البيت طبعا وصلت في ساعه بسبب زحمه قبل الفطار ,الحمدلله وصلت وانا بمنى نفسي بالراحه المذهله بس للأسف ى اصحاب اخواتى الصغيرين على فكره هما صغيرين سنا بس اكبر منى حجما المهم طلبنا الاكل و قلت اريح شويه ,أزاى و دي تيجي ارتاح فى بيت فيهار اخواتى و اصحابهم لأ انا اكيد اتجننت, فضلنا مستنين المغرب و فعلا اذنت و الاكل لسه مجاش قلت اسلى نفسي بأى حاجه ملقيتش احسن من ان اكمل الكتاب الى اخدتوه من زميلى بعنوان النبى و الفرعون فضلت اقرأ فيه شويه كده لحد مالاكل وصل ,كلت الحمدلله وشربت كبايه الشاى و قعدت مع اخواتى و اصحابهم شويه وفضلوا يتريقوا على صاحبهم شويه و يضربوا فى بعض شويه لحد مفكروا انهم يسافروا و فعلا جهزوا شنطهم و نزلوا يسافروا بالسلامه و فضلت انا لوحدي في البيت و دماغى عماله تودى و تجيب يواد كلم اي بنت تجيلك علشان متعدش لوحدك كده المهم الحمدلله شلت الفكره دي من دماغى

وقررت ان انزل الندوه الى فى الحزب و بالمناسبه هو حزب الجبهه الديموقراطيه برئاسه د.أسامه الغزالى حرب و كانت عن معوقات العمل الحزبي في مصر المهم نزلت و رحت لمقر الحزب و سجلت نفسي فى دفتر الحضور وكان ميعاد الندوه المفروض الساعه التاسعه مساء و انا كنت هناك الساعه الثامنه و النصف و كنت رايح بدري علشان الحق مكان كويس في الكراسى الاماميه علشان كان الاستاذ حسين عبد الرازق ممثل حزب التجمع و الاستاذ احمد حسن امين عام الحزب الناصري هيكونوا موجودين طبعا مع الدكتور أسامه الغزالى حرب لمناقشه موضوع الندوه, المهم كعاده المصريين جميعا السيئه الندوه ابتدت الساعه عشره الا ربع و طبعا دون الدخول فى تفاصيل عن المعوقات الى بتعوق العمل الحزبى في مصر لأننا كلنا عارفنها كلها كان فى اسئله مهمه زي برنامج كل حزب ايه و اسئله هجوميه زي سوأل فاديه من مجله روز اليوسف للاستاذ احمد حسن عن ان من اهداف الحزب الناصري ان الرئيس ميفضلش فى الحكم فتره كبيره و ان ده متعارض مع سياسه الحزب الداخليه حيث ان رئيس الحزب فى منصبه منذ 15 سنه حتى الان و طبعا الاستاذ احمد حسن جاله العصبى و ابتدا يوضح اد ايه روز اليوسف حاطين الحزب الناصري فى دماغهم بقلهم كام عدد و طبعا كان المتوقع انهم هينقشوا طرق الحل بس الموضوع كان من وجهه نظري عرض للاحزاب لأن كان كل ممثل حزب سواء الناصري او التجمع بيحاول انه يعلن عن الحزب و ده طبعا عن طريق كلمات زي احنا الوحيدين من دون الاحزاب الي متراقبين من البنك المركزي و ده على لسان الاستاذ حسين عبد الرازق و زي احنا الحزب الوحيد الى معندوش خطوط حمرا وقت مابنقول هانعمل بنعمل و ده كان على لسان الاستاذ احمد حسن امين عام الحزب الناصري فيظهر اننا هنفضل غى نفس المشكله الابديه انه كل حزب هيدخل الانتخابات لوحده و دي نسبه النجاح فيها ما بتتعداش ال 15%

المهم خلصت الندوه و ركبت تاكسى و فى طريقى للبيت جتلى رساله من حبيبتى ردت فيا الروح كانت قلقانه عليا علشان كانت بتحاول تكلمنى بس مكنش فيه شبكه في مقر الحزب فكلمتها و طمنتها واتفقنا انها هتكلمنى اول ما اوصل البيت و فعلا وصلت و غيرت هدومى و صليت العشاء علشان مكنتش لسه صلتها و رنتلها و كلمتنى و كانت دي هى جرعه الحنان الى متعود عليها قبل النوم و كان ده يوم من ايامى العاديه الى احيانا بتيجى قعدت القهوه مع اصحابى مكان ندوات و اجتماعات الحزب وانشاء الله هبقى احكيلكوا تانى على الاحداث الى حصلت بعد اليوم ده

باستغرب كل يوم من السلبيه الشديده بتاعتنا و اد ايه الموضوع بقى حب و تعود على السلبيه و خوف من التغيير خوف زى خوف الخرفان من الجزار او خوف المدين من الديانه خوف مخلى الناس بتخاف تؤول اسمه لايجلهم والمشكله انه من كتر مالسالبيه بقت هى العرف المتفق عليه اصبح انه اى شئ اخر غلط و متخلف... طيب انا هاحكيلكوا على موقف حصلى اول امبارح و انا رايح الشغل فى السى تى ايه او المكيف زي م اصحاب الطبقه الوسطى بيسموة المهم كنت معديين على جامعه القاهرة و كان فيه مظاهرة مئدرتش بامانه اجمع هيا كانت عايزه ايه مكنش فيه يفط او اى حاجه توضح سبب المظاهره و كان فيه طبعا عربيات الامن المركزى الى بيخوفوا بيها العيال الصغيره و كل يوم طبعا بيضربوا مثل فى الطاعه العمياء الى الناس بتستغرب منها و يقولوا هوه في كدا ..ايوة فى كدة و كدة و كدة بما ان مفيش تعليم مفيش تفكير المخ خلاص وقف و مبقاش غير الكامه العليا هى المتحكمه المهم مش عايز اخرج عن موضوعى بس الشارع كان زحمه شويه فجاة لقيت واحده ست طلعت كده زى الاضه المستعجل و كأن هى كانت مستنيه حاجه زى كده علشان تمارس هوايتها المفضله و هى طبعا انتقاد الجيل الجديد و اد ايه الجيل ده عيال فرافير و ان جيلهم هما كانوا العبقريه فى اوج تطورها ملائكه الله فى ارضه المهم لقيتها بتقول هما عايزين ايه دول شباب هبل مفيش وراهم حاجه يعملوها فاكرين انهم كده هايعملوا حاجه ده احنا الكبار بيتخصم منينا فلوس و بيطلع عين ابونا ولا بنتكلم لقيت واحده تانيه بتقولها ايوه يا حاجه صح ربنا يهديهم ساعتها مئدرتش امسك نفسى و روحت طالع انا بقى اشمعنا انا ما اطلعش الطلعه و اولتيلها انتى مش مكسوفه يا ست و انتى بتؤلى انك طالعان عينك و بيتخصم منك و مش بتتكلمى لاء و ايه ده انتى كمان مش مرتاحه انه فى ناس بتحاول تكون ادميه بتفكر و تعترض اذا كان حضرتك راضيه كده على نفسك ففى غيرك كتير مش راضيين انا مش فاهم لو الشباب بئوا سلبيين من دلوقتى لما يكبروا و يكونوا فى مركز سلطه هايحكموا ازاى ؟؟؟ سياسه غريبه اشيد بذكائها فعلا انها قدرت توصل شعبها لكده انا بس يا جماعه مستغرب احنا ليه لحد دلوقتى ساكتين باردين البلد تخرب تولع و ايه يعنى ياعم المهم ان انا عايش فكر غريب سلبيه مذهله كل ده ليه والله معرف يا جماعه بلاش كده كونوا ايجابين ولو مره فى حياتكوا